ادب وشعر | بيئة البيت وأثرُها على بيئة المدرسه بقلم:اسماء طنوس المكر

السبت 28.09.2024

بيئة البيت وأثرُها على بيئة المدرسه بقلم:اسماء طنوس المكر

2015-08-31 10:38:39

زجل بيئة البيت وأثرُها على بيئة المدرسه بقلم:اسماء طنوس المكر

المدرســه لاولادنــــا هي بيتـــهم الثّانــي

للثقـــافـــه والعـــلِـــم وآداب بتــعلّــمــوها

وهالطالـــب الجـــايِ من بيــــت بيعانــي

لَوازم مدرسه منِ الصعب أهلُه يشتروهــا

واولاد بيجوا عالمدرسِه بِبطون جوعانِه

لا معهم المصـروف ولا خُبـــزِه ياكــلوهـا

وعيون الطفل عالغير بتطليعه حزنانِــه

شاف الفرح بعيونــهم جايـــين يِــلاقوهـــا

وفي اولاد جايِـــه منِ بيــوت تعبـــانِـه

كُلها مشاكـــــل وتربـــايِ ما عرفـــوهـــــا

والعنف حاوي بيوتهم بالشرور علقانِه

وِاطفـــال رِبْيوا عالقســـاوِه اللّي ترَبّـوهـــــا

ما سمعوا كلمِه طَيبِه بَل سمعوا إهانِــه

والقسوِه ياللّي فيهـــم للمدرســه جابــــوهــا

وبِيِستنّوا الفُـــرَص وبيـــعِدّوا الثّوانــي

تَيْقيموا الِقْيامِــــه في الحِصّــــه ويِقعدوهـــا

وبيُسكُت الأستـــــاذ ونظراتُــه عتبانِــه

تَيْحِسّوا هالطّلاب بالفَوْضــى اللّي عِملوهـــا

ولمّا بياخــذوا الإنذار طَرْد منِ المكانِ

بيقومــــوا الأهـــــل عالمـدرسِـــه وبيقاتِــلوها

ناس عندهم للّطوَش نفوس عطشانــــه

كُل ما دَق الكوز بالجَرّه بيجــوا تَيْوَلِّعــوهــــا

المقالات المنشورة تعبر عن رأي كاتبها فقط، وموقع المدار بفسح المجال أمام الكاتب لطرح افكاره االتي كتبت بقلمه ويقدم للجميع مساحة حرة للتعبير