ادب وشعر | بعيد الأَم ما بدي من إبني هدية - بقلم: عبور درويش

الاحد 29.09.2024

الرئيسية >> ادب وشعر

(اضف تعقيب)

بعيد الأَم ما بدي من إبني هدية - بقلم: عبور درويش

2016-03-22 07:41:28

بعيد الأم ما بدي من إبني هدية

بعيد الأم ما بدي من إبني هدية ثمينة

لا باقة ورد من فل وياسميني

ولا رسالة حلوة تدمعلها عيني

لا محتاجة ذهب وساعات ولا أساور أو شالات

ما بدي تحتار يَمّا شو تنقّي وشو تختار

الهدية مش بسعرها ولا بالألوان

وما هي سلعة غالي مزينة بسيلوفان

يا ولدي يا أغلى هدية من الرحمن

محتاجة منك وعليك شوية اطمئنان

أشوفك ماشي على دروب الأمان

محتاجة يا ولدي تغفى عيني

خوفي عليك واصِل نهاري بليلي

يَمّا لما تتركني وتروح مع فلان وعلان

وترجع ليلية مدري نعسان مدري غضبان

بسأل عن حالك.. بتجاوب خلص حكي أنا تعبان

لما تقول أُف وبإيدك تأشِرلي بكفّي

بتكون انتِ بكفّة وروحي بكفّة

ببقى ناطرة رجِعتك بكل أوان

بَعِد الخطى مليون مرة من الزوايا للجدران

والوقت ما بمُر ولسعتُه يمّا أصعب من لهيب النيران

يا إمــي لا تنتظريني

ما عُدت ولد صغير

خلص يا أمي بتسألي كتير

وين رايح؟؟ وين كنت ؟؟

لا تتأخر... إرجع بكير

أدرس.. إنجح.. انتبه لحالك

كل يوم نفس المــــّوال

وبالآخر بتقولي إحنا منحبك كتير !!

يا ولــدي حضن الدنيا واسع ولاذع

والعمر بجري وإنت مسابق ومسارع

كبّرتك يوم بيوم

ليليّة ألـــوك التعــب

ومـــا أشكــي ولا ألـــوم

سقيتك من روحي والوريـــد

لقّمتك من زاد العمر لــتكبر وتزيد

ومع كل لقمة زادت على خدي التجاعيد !!

ع إيدي مشيت خطوة خطوة

ع مدرستك يا ما وصلتك

ولما نسيت الزوادة تحت الشتا لحقتك

من حروف العِلم حفّظتك

وتعاليــم الرب فهّمتــك

ومن العِدى بالدُعا حَصّنتك ..

لما كبرت وبانت الرجولة بصوتك

صرت ألحق صدى صمتك

وأملّي عيني من نور بسمتك

لمّا تضحك مع الأصحاب!!

ياما حَضَنت مخدتــك

وواسيت روحي بنظرتك

وناجيت رب السما يُحرسك

ولا يلوّع قلبي بمر الغياب !!

يا نور عيني العمر غَفلة

ما بدي منك الدوا توصِفلي

يا ريت يا ولدي بحالك تُرأفلي

لا تقول مالِــك ومـــالــي

لا تقول يا إمي بدبّر حالي

مهما كبرت وصُرت بالعلالي

بتبقى الطفل الأغلى مني ع حالي!!

يا نور العمر ع روحك لا تقسى

وتربيتي إلك ما تترك ولا تنسى

وما تخلي الدنيا توخدك من مَرسى لمرسى

يا أملي بالحياة ..

لا تبدل أهلك بجمعة أغراب

وتعبّي جيوبك بحفنة ضباب

يا ابني الأهل حضن دافي

وما في متل ريحة الأحباب!!

يا ابني في عيد الأم

هديتي أنت...

بطيبة قلبك.. بحلاوة روحك

بصَحوة ضميرك برزانة عقلك

بشهامتك ...بحسن أخلاقك ..

بإنسانيتك ..بمحبتك ...

كللتك بالرضى يا ابني

ووصيت عليك ملائكة الرحمن !!

عبور درويش
21-03-2016

المقالات المنشورة تعبر عن رأي كاتبها فقط، وموقع المدار بفسح المجال أمام الكاتب لطرح افكاره االتي كتبت بقلمه ويقدم للجميع مساحة حرة للتعبير

تعليق فيسبوك

تعليقك على الموضوع