زجل              لا  لتعنيف الأطفال       

 بقلم الشاعره:اسماء طنوس المكر

طفلَك الجــايِ عالدّنـــي لا تِهمِــلُه

                   عالمحبِّه والحنــان رَبّيه إوْعَ تعَنِّــفُه

واعطيهِ الأمان وعَذِراعيك احملُه

                  أعطيه راحْة البـــال وفي حياتُـه كَيِّفُه

طفلَك منِ الرّبِّ نعمَه إوْعَ تقتُلُـــه

                  إحكِ معو بِمْلـــيح وِلسانَــــك نظِّـــفُه

ولا تِجْرحُه بكِلمات إوْعَ تبَهدِلُــــه

                 ولَوْ شُغْلُه ما اعجَبَك لا تقولُّه مااقْرَفُه

واحترم رَأيُه وفِكرُه لا ما تزعِّلُــه

                  واللّي ما بيِقـــدر عليه ما تبقى تكَلِّفُـه

ولا تِلعَنِ اليوم ال أجا فِيّو وتــسِبِّلُه

                   ولا تِلعن اللّي جابُـه واللّــي خَلَّـفُــه

كلامَك الجارح كالسّيف يمكن يُقتُلُه

                   إيّاكَ من سُمِّ اللّسان وبالملايِح لَطِّفُه

إبنَك حبيبـَك دوم بالمحبّـِـه عامِــلُه

                   وخلّيه يحكـي عاللّــي فيه لا تكَتِّفُــه

وباب الأمـــل قُدّامُــه إوْعَ تِقْـفــِلُـه

                  خلّيك معو صريح وضغطُه خَفِّـــفُه

ولا تعاقِبُه بشغلات ونتايْجا تْحَمِّلُه                               

                  ولا تِحْرِجُـــه بسُــؤال ولا تْحَلـِّــفُـه