كل الصور متعلقه
براويز
مسامير بترشق في
الجدار الهش
بتوقف العواجيز
عكازات القش
متصلبه الاحلام
كلام اتقال
او احتمال
ما تقلش
زحمه نفوخ بيدوخ
وبيركز
كل الصور علي
بعض تتعكز
توصل لمعني
مايحبش التفاصيل
كل الصور صوره
تتشاف في عز اليل
تلضمها عين مقفوله
بتحن للدفيان
وللانسان
في اول
الحواديت
الشعر مش هزيان
لكنه يكره يتسمع
في السر
الصوره لما بتتنطق
بتفر
وتقر ان الكون
بطبعه فسيح
كل الحروف
علي لوحه المفاتيح
كل الصور متعلقه
براويزوالفعل قوله وجيز
والفكره بالتعجيز
بتتكرر
صوره غريب
في حزمه الغرباء
لون الدماء
خلفيه الاعداء
والشعب شاء
والنداء اتلاقا
بالصدفه والترتيب
الوان بتتشاقا
حريه التجريب
في فوضي خلاقه
ما بين نياب الديب
دور القدر جائا
صوره جيفارا
والده بالالوفات
دم الشهيد
بيقصر المسافات
ترجع تتوه القضيه
ببركه البهوات
وبركه الدروايش
يجي الشاويش
يدي التمام للغفر
الفخ وحده في الميدان
يتحفر
و لأ
بكره
تساوي
كلمه كفر
صوره الشهيد
هي الحقيقه المره
طلق الرصاص في الميدان
مكتوب عليه بالعبري
انا
قتلت الدره
واي روح حره
بتحاول التحليق
صور الامل عالجدار
هي اختيار الشوف
هي المحاوله الباقيه
جوه عيون الخوف
هي الحاجات الي فاضله
ايمانها فاق المناضله
ونضالها
فاق الكلام
عمرو السعودي