ادب وشعر | طار الحمام بقلم زاهد عزت حرش | موقع المدار الاول في الشمال

الثلاثاء 16.06.2026

الرئيسية >> ادب وشعر

(اضف تعقيب)

طار الحمام بقلم زاهد عزت حرش

2014-01-08 16:54:31

طار الحمام زاهد عزت حرش يا مين قاصِد ع النَبع طار الحَمام يّحكي حَكي للناس عَن دار السلام(1) رِجعَت بلدنا بالزَمن شِي مّيت عام مثل وكَأنها رغيف ع صحن الطَعام قَسّموها ع المَذاهب والطَوائف والمَقام وعِملوا مَضاربها وسائِل استِلام لو كان إنو القَصد تـَ يعُم الوئام بَين الخَلائق لا خِلاف ولا خِصام ما جمَّعوا الأقطاب ع حَد الحُسام ولا العَقل ضَاع ولا انسَمَع مِنُه كلام ولك يا حلِم جَاي قاِصد تزّيح اللثام عن عَهد كان ملَوّث بقِسمة حَرام جاي عَلينا بفيلم ضَابِط ع التَمام مِثل اللي غَيَّر بِالشكل مِش بالقَوام يا مرَتِب الأدوار في سِلك الدَوام كيف عِندَك قَلب تِغّفى او تنام ما زال إنُه الوَعد قِصة انتِقام او في حَدا قابِض بِكَفُه ع الّلجَام هوي اللّي عِندُه المَرجَعية والزِمام عِندُه القَرار لَمّين قَعَد ومين قام عَلّقت على صِدرُه أسِم أعلَى وِسَام وصَار عِندُه مَركَز وقِيّمه ومَقام ع ذِكر اسمُه بالمَحَافل يا كِرَام أتعدَل القانون ع قياسُه تَمام وحَتى تَتوازَن مَقامَات الغَرام حِفاظًا على سِلم البَلد لما تنام أعطوا لَغيرُه مَحفَظِة حِفظ النِظام وصَار وعدُه ع الحُكُم قَائم مَقام حَاكِم بأمرُه ع الضِحِك والابتِسام مثل وكأنها الشمس مَحجوبة بحرام وبَعد التَداول والنِقاش باحتِدام انفَرط عِقد المَسبَحة عِند الخِتام بَس الخُلاصَة بَعد مَا طَاروا الوعد رِجعَت بلدنا بالزَمن شي ميّت عام شفاعمرو – كانون ثاني 2013 (1) مدينة شفاعمرو سميت بزمن ظاهر العمر بدار السلام

المقالات المنشورة تعبر عن رأي كاتبها فقط، وموقع المدار بفسح المجال أمام الكاتب لطرح افكاره االتي كتبت بقلمه ويقدم للجميع مساحة حرة للتعبير