ادب وشعر | زجل الفيسبوك عدُوُّك بقلم:اسماء طنوس المكر

الثلاثاء 16.06.2026

زجل الفيسبوك عدُوُّك بقلم:اسماء طنوس المكر

2016-02-12 13:25:34

الفيسبوك عدُوُّك

قالولي اعْملي فيسبوك ___ قُلِت شو بَدّي فِيّــو

بيجيبلي وَجَــع الرّاس ___ أنـا بالــغِنـى عَنّــو

__________________________

ليه تَأنشُــر أسراري ___تِتناوَلها الفيسبوكات

وليه يِعرفوا أخباري ___بالرّايْحات وبالجايات

ويُطُبخــوها عالنّــارِ ___يْزيدواعليها الِبْهارات

الأحسن رَيِّح أفكاري___ ألله يْنَجّــيــنــا مِــنّـــو

__________________________

بيسَبِّـبلَــك مشـاكــل ___ بْتوقَع بِلْساناتِ النّـاس

خَلّيك حكيم وعاقـل ___ ما بيِرحموك الخُسّاس

لا تِمشِ مع المايِـل ___ فِكْـرُه إلَـك ما بيِنــقاس

قلبَك الطّيِّب شايِـل ___ حُبّ الخير ومِش زَيّــو

___________________________

ياما حَطّمواأشخاص___ بأخبـارِ ال زَوَّروهــا

كِذْبِه وما إلْها أساس ___كُلّ النّــاس صدّقوهــا

والبشر فِيّو أجنـاس ___ مَعــادِن لَوْ حَكّــوهــا

بِتلاقي فيهُم ارْخاص ___ وِالطَّيِّب غالي ثَمَنـو

__________________________

وياما سَبَّــب جرايِــم ___ غَدْر وقَتْل وفضايِح

بعَقِلهُــم يالـلّي نايِــم ___ عَم يِقتِرفوا القبايِح

وِبْيِحـكـوا بِالشّتـايِــم ___ وكُلٌّ ضميـرُه بايِــع

قلبُــه بالعَيْـبِ عايِـم ___ عيوبُه عَتّمَت عَينُــو

__________________________

بَنصح كُل واحِد فيكو___ ما يِفْشي سِرُّه لغيرُو

بيكون الحَــقّ علَيْكو ___ لَــوِ أتّبَـعْـتـوا شَــرّو

بِتْجيبـوا الأذى ليـكو ___ لَوْ وَراهُ بـتِـنـجَــرّوا

بِالرّاحه ما يْخلّيـكو ___ وغير النّدَم ما بتِجنوا

المقالات المنشورة تعبر عن رأي كاتبها فقط، وموقع المدار بفسح المجال أمام الكاتب لطرح افكاره االتي كتبت بقلمه ويقدم للجميع مساحة حرة للتعبير